नेपालगञ्ज ११ जेठ। भारतीय सीमापारीबाट आउनेमा नेपाली नागरिकमा कोरोना संक्रमण रहे नरहेको जाँच गर्नको लागि जमुनाह नाकामा स्थापना गरिएको हेल्थ डेस्कले करिब ९० हजार नागरिकको सीमा क्षेत्रमै कोरोना परिक्षण गरेको छ ।नेपालगञ्ज उपमहानगरद्वारा २०७७ चैतमा सञ्चालनमा ल्याईएको सो हेल्थ डेस्कले २०७९ जेठ ९ गतेसम्म ८५ हजार ५ सयको एन्टिजेनको माध्यामबाट कोरोना परिक्षण गरिएको हेल्थ डेस्कका ल्याब टेक्नेसियन चिरञ्जिबी ज्ञवालीले जानकारी दिए । उनले दिएको जानकारी अनुसार भारतबाट नेपाल आउदै गरेका नागरिकको कोरोना परिक्षण गर्दा १ हजार ३ सय २ जनामा कोरोना पुष्टि भएको छ । सीमा क्षेत्रमा कोरोना पुष्टि भएका संक्रमितमा चिन्ह लक्षण देखिएकालाई कोरोना अस्पताल र चिन्ह लक्षण नदेखिएकालाई आईशोलेशनमा पठाउने गरिएको छ । यसैगरी सोही हेल्थ डेस्कले भारतबाट नेपाल आउने १६ हजार ३ सयको औलो परिक्षण गर्दा ३ जनामा संक्रमण भेटाएको, १ हजार १ सय ५७ जनाको क्षयरोगको परिक्षण गर्न खकार परिक्षण गर्दा १० जनामा टिबि संक्रमण भएको पाईएको र २ सय ६० जनाको एचआईभि परिक्षण गर्दा संक्रमित फेला नपरेको हेल्थ डेस्कका ल्याब टेक्नेसियन ज्ञवालीले जानकारी दिए । उनले भने–‘ कोरोना परिक्षण भारतबाट आउने सबैको गर्ने गरेको छ । रुघा ज्वरोको लक्षण भएकालाई औला, क्षयरोगसमेतको परिक्षण गर्ने गरिएको र रेण्डम्ली एचआईभी परिक्षण गर्ने गरिएको छ ।’ नेपालगञ्ज उपमहानगरपालिका स्वास्थ्य शाखा प्रमुख तथा जनस्वास्थ्य अधिकृत रामबहादुर चन्दले जमुनाह नाकामा रहेको हेल्थडेस्कले भारतबाट आउनेको एन्टिजेनका माध्यामबाट कोरोना संक्रमण भए नभएको पत्ता लगाउने र संक्रमण भएको पाईएमा उनीहरुलाई उपमहानगरले निर्माण गरेको आइशोलेशन सेन्टरमा पठाउने गरिएको बताए । उनले नेपालगञ्ज उपमहानगरमा कोरोना खोपको पहिलो मात्रा करिब ९८ प्रतिशतले लगाएको र दोस्रो मात्रा पनि सोही हाराहारीमा लगाउने प्रयास भएकोे जानकारी दिदै भने–‘पहिलो मात्रा पनि कोरोना खोप लगाउन नपाएका वा छुटेकालाई उपमहानगरले वडानं. ४ को स्वास्थ्य संस्थाबाट नियमित खोप लगाई रहेको छ । नेपालगञ्ज उपमहानगरले पहिलो र दोस्रो संक्रमणबाट पाठ सिकेर आगामी दिनमा विपदको बेलामा काम गर्न सहज होस भनेर विभिन्न गतिविधि समेत गर्दै आएको छ ।’