काठमाडौं ३ असार।एमालेका वरिष्ठ अध्यक्ष तथा सांसद ईश्वर पोखरेलले एसपीपीबारे सत्यतथ्य पत्ता लगाउन समिति गठनको माग गरेका छन् । प्रतिनिधिसभा अन्तर्राष्ट्रिय सम्बन्ध समितिको शुक्रबारको बैठकमा पूर्वउपप्रधान तथा रक्षामन्त्री पोखरेलले एसपीपीबारे कुन मितिमा कसले के गरेका थिए भन्नेबारे स्पष्ट पार्न समिति गठनको माग गरेका हुन् । एमाले सांसद भीम रावल र कांग्रेस सचेतक पुष्पा भुसालले सन् २०१९ मा नेपाल एसपीपीमा सहभागी भएको र त्यतिबेला प्रधानमन्त्री र रक्षामन्त्रीको जिम्मेवारीमा को थियो भन्ने प्रश्नको जवाफमा पोखरेलले उक्त माग गरेका हुन् । 'आउने दिनमा यस्तो तलवितल नहोस् भनेर समिति बन्नुपर्छ । कसको पालामा के भएको थियो भन्ने जान्न समिति बन्नु जरुरी छ,' समिति सभापति पवित्रा निरौला खरेलसँग पोखरेलको माग थियो । पोखरेलले १० सेप्टेम्बर २०१५ मा जंगी अड्डाले रक्षा मन्त्रालयलाई एसपीपी सहभागिताका लागि पत्र पठाएको त्यसको २० दिनपछि तत्कालीन प्रधानमन्त्री तथा रक्षामन्त्री सुशील कोइरालाले स्वीकृति दिएको र सोही आधारमा ओली नेतृत्वमा सरकार बनेपछि सेनाले अमेरिकी दूतावासलाई पत्र लेखेको दाबी गरे ।सन् २०१९ मा एसपीपीलाई आईपीएस सैन्य गठबन्धनमा जोडेपछि सचिवकै नेतृत्वमा समिति गठन गरेको र संलग्न नहुने बताए ।