काठमाडौँ । नेकपा माओवादी केन्द्रले वार्ता टोली गठन गरेपनि संवादमै सीमित भएको छ । विभिन्न शक्तिहरुसँग पार्टी एकता वा मोर्चाबन्दी गर्न छलफल गरेपनि टोली संवादमै सीमित भएको हो ।माओवादी केन्द्रले गत पुस २३ गते विभिन्न वाम शक्तिहरुसँग पार्टी एकता गर्न पाँच सदस्यीय वार्ता टोली गठन गरेको थियो ।  पार्टी उपाध्यक्ष कृष्णबहादुर महराको नेतृत्वमा महासचिव देवप्रसाद गुरुङ, उपमहाचिवहरु जनार्दन शर्मा, शक्तिबहादुर बस्नेत र गिरिराजमणि पोखरेल सदस्य छन् । ‘पार्टीले वार्ता टोली बनाएपछि पार्टी एकता वा मोर्चाबन्दी गर्ने विषयमा विभिन्न पार्टीहरूसँग संवाद जारी राखेका छौं’ गुरुङले भने, ‘अब छिट्टै सुखद सन्देश सुन्न पाइने छ । केही पार्टीहरूसँग एकता हुन्छ ।’ तर, कुन कुन पार्टीसँग कसरी एकता हुँदैछ भन्ने विषयमा गुरुङले खुलाएनन् ।