काठमाडौँ । काठमाडौँ महानगरपालिका–२७ ज्याठास्थित छाया सेन्टर अगाडी ड्युटीमा खटिएका प्रहरीका जवान र हवल्दारमाथि  माघ २४ मा मध्यराति आक्रमण भयो ।  नेकपा एमालेको भातृसंगठन अनेरास्ववियुका स्थायी समिति सदस्य कमल जोशी घटनास्थलको सिसिटिभी फुटेजमा आत्रमणकारीहरु सँगै देखिन्छन् । अमृत साइन्स क्याम्पसको स्वतन्त्र विद्यार्थी युनियनका सहसचिव रमेश फुलारा र दिनेश सिग्देल पनि कुटपिटमा संलग्न थिए । ती दुई जनालाई प्रहरीले पक्राउ गरेको छ । तर, जोशी अहिलेसम्म प्रहरीको अनुसन्धानबाट बाहिर छन् ।अनेरास्ववियुको अस्कल क्याम्पस कमिटी सचिव गोपालबहादुर शाही, क्याम्पस कमिटी सदस्य नवीन ऐर र शौजन्य शाहीलाई प्रहरीले फरार सूचीमा राखेको छ । अनेरास्ववियुका स्थायी समिति सदस्य कमल जोशीलाई चाहिँ फरार सूचीमा पनि छैनन् ।  अनुसन्धान घेराबाट बाहिर छन् ।घटनामा संलग्नलाई कानुनी दायरामा ल्याउन गृहमन्त्री रमेश लेखकले निर्देशन दिएका छन् । माघ २४ मा मध्यराति ‘राउण्ड अप ड्युटी’ मा खटिएका प्रहरी जवान नगेन्द्रराज विष्ट र हवल्दार जुगलाल घर्तीलाई जोशी नेतृत्वको टिमले आक्रमण गरेको थियो । आक्रमणमा संलग्नहरूलाई कानुनको दायरामा ल्याउने जिल्ला प्रहरी परिसर काठमाडौँका एसएसपी विश्व अधिकारीले बताएका छन् । माघ २९ मा भद्रकालीस्थित परिसरमा आयोजित पत्रकार सम्मेलनमा उनले भनेका थिए– ‘अनुसन्धान गर्दै जाँदा दोषी देखिनेहरू कानुनी दायरामा आउँछन् ।त्यसअघि अधिकारीले आक्रमण गर्नेमा जोशीको संलग्नता नभएको बताएका थिए । रातोपाटीसँग उनले भनेका थिए, ‘प्रहरीमाथि आक्रमण गर्दा उनले रोकेको सीसीटिभी फुटेजमा देखिएको छ, त्यसैले प्रतिवादी बनाउनुपर्ने अवस्था छैन ।आरोपीहरूले दुई जना प्रहरीले आफूहरूमाथि मुख छाडेपछि आक्रमण गरेको जिकिर गरेका छन् । तर, जवान र हवलदारले चाहिँ सडकमा हल्ला गरेपछि सम्झाउँदा उल्टै आफूहरूमाथि आक्रमण गरेको बताएका छन् । हवल्दार घर्तीको टाउको र छातीमा चोट लागेको छ । जवान विष्टको आँखामा चोट लागेको छ । आँखै अगाडि साथी गुमाउनेलाई ज्यान मुद्दा माघ २७ मा चाबहिलमा सञ्चालित दोहोरी साँझ र डान्सबारबाट निस्कनेहरूको मोबाइल चोर्ने र सो मोबाइल लुट्न खोज्ने समूहबिच झडप भयो । बिहानीपख डान्सबारबाट निस्केकाहरूको एउटा मोबाइल ३ जना मिलेर चोरे । मोबाइल चोरी गर्नेमा सिन्धुपाल्चोक घर भएर गोकर्णेश्वर बस्ने २० वर्षीय विशाल तामाङ र झापा घर भएर गोकर्णेश्वर बस्ने क्षितिज कार्की संलग्न थिए । चोरीमा संलग्न अर्का एक जना फरार छन् ।उनीहरूले मोबाइल चोरेको युनिक लामा भन्ने नुर्बु शेर्पा र काभ्रे घर भएका अमृत भन्ने सङ्घर्ष कार्कीले देखे । त्यसपछि उनीहरूले चोरीको मोबाइल लुट्ने योजना बनाएर अरू ३ जनालाई पछ्याए । काठमाडौँ महानगरपालिका–७ स्थित कुमारीगालमा पुगेपछि उनीहरूको बिचमा झडप भयो । झडप हुँदा क्षितिज कार्कीले छुरा प्रहार गरेर काभ्रेको धुलिखेल घर भएर गोकर्णेश्वर बस्ने २३ वर्षीय अमृत कार्की ‘सङ्घर्ष’ को हत्या गरे । अमृतको समूहका हुन् नुर्बु । दोलखा घर भएर कपन बस्दै आएका २२ वर्षीय नुुर्बु शेर्पाले आफ्नै अगाडि अमृतलाई गुमाए । क्षितिले चक्कु प्रहार गरेर अमृतलाई ढालेपछि नुर्बुले प्रतिकार गरे । तर, प्रहरीले नुर्बुलाई पनि पक्राउ गरेर ज्यान सम्बन्धी कसुरमा अनुसन्धान गरिरहेको छ ।माघ २९ मा भद्रकालीस्थित जिल्ला प्रहरी परिसरमा प्रहरीले पत्रकार सम्मेलन गरेर नुर्बुलाई पनि सार्वजनिक गरेको थियो । जिल्ला प्रहरी परिसर काठमाडौँका एक जना अधिकृत भन्छन्, ‘नुर्बु अमृत समूहका हुन्, हुलमुलमा पक्राउ परेका हुन् ।’  हत्यामा संलग्न २० वर्षीय विशाल तामाङ र क्षितिज कार्कीलाई पक्राउ परेका छन् । अर्का एक जना हत्या आरोपी फरार छन् ।