काठमाडौँ । परराष्ट्र मन्त्रालयका सचिव अमृतबहादुर राईले आगामी आर्थिक वर्षमा मन्त्रालयको बेरुजु फर्स्योटको लक्ष्य ६१ प्रतिशतसम्म पुर्‍याउने कार्ययोजना रहेको बताएका छन्। प्रतिनिधि सभा अन्तर्गतको सार्वजनिक लेखा समितिको बैठकमा बोल्दै उनले हाल मन्त्रालयको जिम्मामा करिब २ अर्ब ८५ करोड रुपैयाँ बराबरको बेरुजु रहेको जानकारी दिँदै यसलाई क्रमशः घटाउँदै लैजाने सरकारी योजना रहेको स्पष्ट पारेका हुन्। सचिव राईका अनुसार सार्वजनिक लेखा समितिको निर्देशनलाई पालना गर्दै आर्थिक वर्ष २०८२/८३ र २०८३/८४ का लागि आगामी साउन महिनादेखि पुस महिनासम्म आवश्यक प्रमाण सङ्कलन गर्ने विशेष कार्यक्रम तय गरिएको छ। यसै अवधिमा बेरुजु फर्स्योट गरी सम्परीक्षणका लागि महालेखा परीक्षकको कार्यालयमा पेस गर्ने तयारी मन्त्रालयले गरेको छ। यस प्रक्रियाबाट करिब १ अर्ब ७३ करोड रुपैयाँ बराबरको बेरुजु फर्स्योट गर्ने लक्ष्य राखिएको छ। मन्त्रालयले तय गरेको उक्त लक्ष्य पूरा गर्न सकेको खण्डमा आगामी आर्थिक वर्षमा कुल बेरुजुको करिब ६१ प्रतिशत हिस्सा फर्स्योट हुनेछ। अथक प्रयासका बाबजुद पनि पुराना सञ्चित बेरुजुहरूका कारण मन्त्रालयको वित्तीय अनुशासनमा प्रश्न उठ्ने गरेको भन्दै उनले अब प्रमाण जुटाउने कार्यलाई तीव्र बनाइने प्रतिबद्धता व्यक्त गरे। सचिव राईले बेरुजु फर्स्योटका क्षेत्रमा भएका बाँकी प्रगतिहरू तथा थप विस्तृत विवरणहरू समय र आवश्यकता अनुसार संसदीय समितिमा निरन्तर प्रस्तुत गर्दै जाने जानकारी समेत समितिलाई दिएका छन्।