काठमाडौँ । नेकपा एमालेका महासचिव शंकर पोखरेलले मुलुकको  ओरालो यात्रा रोक्न एमाले सत्ता समीकरण फेरबदलमा लागेको दाबी गरेका छन् । मंगलबार एमाले बागमती प्रदेश कमिटीको बैठकमा कार्यकर्ताहरूलाई प्रशिक्षण दिँदै महासचिव पोखरेलले मुलुक ओरालो यात्रामा अघि बढिरहेका बेला सत्ता समीकरणमा बदलाव ल्याएको बताएका हुन् । ओरालो यात्रालाई रोक्ने र मुलुकलाई सकारात्मक दिशातर्फ फर्काउने प्रयत्न गरिरहेका छौ’, महासचिव पोखरेलले भने, ‘र हामीले हाम्रा मन्त्री र कामका जिम्मेवारीहरूलाई प्रभावकारी बनाउने कुरा प्रमुख कर्तव्य त हुँदै हो । सँगसँगै सरकारलाई पनि सकारात्मक दिशातिर बढाउने कुरामा हाम्रो भूमिका रहनुपर्दछ ।’ उनले एमालेको नीतिबाट मुलुकलाई सकारात्मक दिशातिर लैजान चाहेको भन्दै जे जिम्मा पाइन्छ त्यसमाध्यमबाट मुलुकलाई सकारात्मक दिशामा लैजान सकिन्छ भन्ने सन्देश दिन चाहेको बताए । उनले त्यसक्रममा एमाले मिसन ८४ र समृद्ध नेपाल सुखी नेपालीको यात्रामा हिँडिरहेको बताए ।