काठमाडौँ । त्रिभुवन विश्वविद्यालय सेवा आयोगको सदस्यमा प्राडा अजय भट्टराई नियुक्त भएका छन् । त्रिविका कुलपति तथा प्रधानमन्त्री पुष्पकमल दाहाल प्रचण्डले भट्टराईलाई सेवा आयोगको सदस्यमा नियुक्त गरेका हुन् शिक्षामन्त्रीको अध्यक्षतामा रहेको सदस्य सिफारिस समितिले भट्टराईलाई सिफारिस गरेको थियो । कुलपति प्रचण्डले समितिको सिफारिस अनुसार नै नियुक्त गरेका हुन् । उनीसँगै प्राडा सञ्जय आचार्य वैकल्पिकमा परेका थिए । प्रस्तुतीकरण, अन्तर्वार्ता र सिफारिसपछि उनीहरूमध्ये भट्टराईलाई सिफारिस गरेको थियो । त्रिविमा शिक्षक तथा कर्मचारीहरूको नियुक्ति तथा बढुवाका लागि सिफारिस गर्न ३ सदस्यीय आयोग हुने व्यवस्था छ ।आयोगको अध्यक्ष र एक सदस्य कुलपतिले नियुक्त गर्छन् भने एक सदस्य लोक सेवा आयोगका सदस्यबाट चयन गरिन्छ । कुलपतिबाट नियुक्त हुने अध्यक्ष र सदस्यको पदावधि ३ वर्षको हुने व्यवस्था छ ।आयोगको सदस्य पद गत मङ्सिरदेखि रिक्त थियो । सदस्य पद रिक्त हुँदा आयोगले लामो समयदेखि पदपूर्ति गर्न सकेको थिएन ।