काठमाडौँ । नेपाल फार्मेसी परिषद्ले फार्मेसीमा परिचय र पोसाक अनिवार्य लागू गर्ने भएको छ । आगामी पुस ४ गतेबाट फार्मेसीमा परिचय र पोसाकको अनिवार्य व्यवस्था लागू गराउने भएको हो ।स्वास्थ्य तथा जनसङ्ख्या मन्त्री प्रदीप पौडेलले फार्मेसीलाई व्यवस्थित गर्नका लागि आवश्यक व्यवस्था गर्न परिषद्लाई सुझाएका थिए । सोही अनुसार परिषद्ले पहिलो चरणमा फार्मेसिष्टको पहिचान खुलाउन पोसाक अनिवार्य गर्ने निर्णय गरेको हो । मन्त्रालयका प्रवक्ता डा.प्रकाश बुढाथोकीले परिषद्को निर्णय कार्यान्वयनमा सघाउन मन्त्रालयले पत्राचार गर्ने बताए । यसका अलावा औषधी बिक्री वितरणमा बेथिति देखिए नदेखिएको समेत अनुगमन गर्ने र दोषी देखिएमा एकै साथ कारबाही अघि बढाइने उनले बताए ।मन्त्री पौडेलले औषधीको मूल्य समायोजन गर्नका लागि गठित समितिले अहिले काम गरिरहेको बताए । समितिको सुझाव अनुसार अधिकतम उपयोग हुने औषधीमा नागरिकलाई कम भार पर्ने गरी मूल्य समायोजन गर्ने मन्त्रालयको तयारी छ ।