विराटनगर । राष्ट्रिय प्रजातन्त्र पार्टीका महामन्त्री धवलशमशेर राणाले चैत १५ गतेदेखि काठमाडौंमा संयुक्त जनआन्दोलन हुने घोषणा गरेका छन् । उनले अब जे हुने काठमाडौंमा हुने भन्दै सबैलाई आन्दोलनमा सहभागी हुन पनि आव्हान गरे ।विराटनगरको पुष्पलाल चोकबाट देशभक्त राष्ट्रवादी अभियानले गरेको मोटरसाइकल र्यालीको समापन गर्ने क्रममा उनले– गणतन्त्रको दिनगन्ती सुरु भएको बताए । उनले आन्दोलनको हावा चलेको अवस्थामै बाटो छोड्न गणतन्त्रवादी र संघीयतावादीलाई आग्रह गरे । त्यसो नगरे आँधीहुरी आउने र त्यो बंगलादेश र श्रीलंकाको जस्तै हुने चेतावनी पनि दिए । गणतन्त्र, संघीयता, भ्रष्टाचारीहरुको दिनगन्ती सुरु भइसक्यो । अब राजसंस्था आयो । राजावादी, राष्ट्रवादी, हिन्दुवादी, गणतन्त्र विरोधी, संघीयता विरोधी, भ्रष्टाचार विरोधीहरुलाई एकजुट हुन अनुरोध गर्दछु,’ राणाले भने– ‘देशमा परिवर्तनको हावा चलिसक्यो । यो हावा आँधीहुरीमा परिवर्तन हुनु अगाडि बाटो छोड हुन्छ । आँधीहुरी आयो भने बंगलादेश र श्रीलंकामा जस्तो नेपालमा होस् भन्ने हामी चाहँदैनौं ।’ उनले दमन गरेको खण्डमा जनताले आफ्नो निर्णय लिने पनि बताए ।उनले भने– आफूहरू अहिंसाप्रेमी, हिन्दुवादी भएको बताउँदै बम हान्ने, अपहरण गर्ने काम नहुने टिप्पणी गर्दै जनताको बलमा राजासहितको हिन्दूअधिराज्य र प्रजातन्त्रसहितको व्यवस्था चाहेको दावी गरे । उनले राजसंस्था फर्काएर देशलाई विश्वको समृद्ध राष्ट्र बनाउने पनि दाबी गर्दै ‘१५ गते सुरु हुन लागेको संयुक्त जनआन्दोलनलाई साथ दिन र शान्तिपूर्ण आन्दोलन हुनेभएकाले सफल हुने बताए ।