काठमाडौँ । श्रम आप्रवासनका क्षेत्रमा कलम चलाउने तीन पत्रकारलाई ‘श्रम रोजगार पत्रकारिता पुरस्कार–२०८०’ प्रदान गरिएको छ । श्रम रोजगार पत्रकार समूह र प्रवासी नेपाली समन्वय समिति (पिएनसिसी) ले आज यहाँ आयोजना गरेको कार्यक्रममा श्रम रोजगार तथा सामाजिक सुरक्षा मन्त्री शरत्सिंह भण्डारीले पुरस्कार प्रदान गरे ।पुरस्कृत हुनेमा कृष्णसिंह धामी (काठमाडौँ), रुपा गहतराज (बाँके) र लक्ष्मण खनाल (संयुक्त अरब इमिरेट्स) रहेका छन् । पुरस्कारको राशि जनही रु २० हजार रहेको छ । उपत्यका, मोफसल र प्रवासमा रहेका क्रियाशील पत्रकारलाई प्रोत्साहन गर्ने उद्देश्यले पुरस्कार प्रदान गरिएको समूहका अध्यक्ष सुनील न्यौपानेले जानकारी दिए । राष्ट्रिय महिला आयोगका सदस्य कृष्णकुमारी खतिवडाले वैदेशिक रोजगारीका अवसरलाई लैङ्गिक रुपमा विभेद गर्न नहुने उल्लेख गर्दै वैदेशिक रोजगारीका क्रममा भएका ठगीका घटनामा संलग्नलाई कडा कारबाही गरिनुपर्ने बताए ।नेपाल वैदेशिक रोजगार व्यवसायी सङ्घका अध्यक्ष राजेन्द्र भण्डारीले वैदेशिक रोजगार क्षेत्रलाई व्यवस्थित बनाउन सबैको भूमिका महत्त्वपूर्ण रहेको बताए ।