काठमाडौँ । विभिन्न देशका लागि पर्यटन प्रवर्द्धक नियुक्त भएकाहरूका लागि संस्कृति, पर्यटन तथा नागरिक उड्डयन मन्त्रालयले आइतबार अभिमुखीकरण कार्यक्रम सम्पन्न गरेको छ । मन्त्रालयमा आयोजित कार्यक्रममा बोल्दै विभागीय मन्त्री हितबहादुर तामाङले पर्यटन प्रवर्द्धकहरुलाई सफल कार्यकालको शुभकामना दिँदै देशको हितमा काम गर्न आग्रह गरे । नेपालमा पर्यटनको प्रचुर सम्भावना रहेको उल्लेख गर्दै आफ्नो कार्यक्षेत्र भएको देशमा गएर नेपालको बारेमा प्रचार प्रसार गर्न उनले आग्रह गरे । यस्तै मन्त्रालयका सचिव दीपक काफ्लेले देशको पर्यटन प्रवर्धनमा हालै नियुक्त भएका पर्यटन प्रवर्द्धकहरुले सकारात्मक भूमिका खेल्ने विश्वास व्यक्त गरे । नवनियुक्ति पर्यटन प्रवर्द्धकको तर्फबाट धारणा राख्दै सोमनाथ सापकोटाले आफू निरन्तर नेपालको पर्यटन प्रवर्द्धनमा लागिपरेको भन्दै अहिलेको थप सक्रियता बढाउने बताए । बेलायतको वेल्सका लागि पर्यटन प्रवर्द्धक नियुक्त भएका उनले आफ्नो तर्फबाट भावी योजना समेत सुनाएका थिए । सो अवसरमा  पर्यटन प्रवर्द्धकहरुलाई नियुक्तपत्रका साथै परिचयपत्रलगायत हस्तान्तरण गरिएको थियो । कार्यक्रममा भौतिक रूपमा उपस्थित हुन नसकेका पर्यटन प्रवर्द्धकहरुलाई अनलाइनमाध्यमबाटै अभिमुखीकरणको व्यवस्था मिलाइएको थियो ।