काठमाडौं १६ असार। नेपालमा क्रियाशील विभिन्न संघ संस्थाहरुले महिलाहरुलाई गर्भपतन गर्न रोक लगाउने अमेरिकी सर्वोच्च अदालतको फैसलाको विरोध गरेका छन् । प्रजनन स्वास्थ्य अधिकारसम्बन्धी कार्य समूह (आरएचआरडब्ल्युजी), महिला कानुन र विकास मञ्च, सुनौलो परिवार नेपाल, सञ्चारिका समूह, साथी लगायतका विभिन्न संस्थाले एक विज्ञप्ति मार्फत अमेरिकी सर्वोच्च अदालतले महिलाहरुलाई गर्भपतनको अधिकार प्रत्याभूति गर्ने ‘रो विरुद्ध वेड’ को मुद्धामा स्थापित गरेको नजिरलाई उल्ट्याउने गरी गरेको फैसलाको भत्सर्ना गरेका छन् । जारी विज्ञप्तिमा भनिएको छ– ‘गर्भपतन प्रतिवन्ध लगाउने कुरा सामान्यतः अप्रभावकारी हुन्छ । गर्भपतनमा बन्देज लगाउँदा महिलाहरु झन् असुरक्षित गर्भपतनको साहारा लिन बाध्य हुन्छन् जसले गर्दा लाखौँ व्यक्तिको जीवन खतरामा पर्छ । गर्भपतन सम्बन्धी निकै प्रतिबन्धात्मक कानुनी संरचनालाई प्रोत्साहन दिने यो निर्णयले अल्पसंख्यक तथा महिला समुदायहरूमाथि अनुपातहिन प्रभाव पार्नेछ र गर्भपतनलाई कलंकको रुपमा बुझ्ने र हेर्ने प्रवृत्तिलाई झनै बढवा दिनेछ । हालै अमेरिकाको सर्वोच्च अदालतले ‘रो बिरुद्ध वेड’ गर्भपतनलाई कानुनी मान्यता दिने ५० वर्षअघिको मुद्धाको आदेशलाई उल्टाएपछि अमेरिकाको आधाजस्तो राज्यले गर्भपतनमा नयाँ प्रतिबन्ध लगाउने अनुमान गरिएको छ । अमेरिकी राष्ट्रपति बाइडेनले पनि सो अदालतको सो फैसला दुःखद रहेको टिप्पणी गरेका छन् ।