Comments
जनकपुर । नेकपा एमालेका सचिव एवं मधेस प्रदेशका इन्चार्ज योगेश भट्टराईले सबैको सुदृढ एकताबाट देशलाई गरिबी, अशिक्षा र पछौटेपनबाट मुक्त गराउनुपर्ने बताएका छन् । नेकपा एमाले धनुषाको क्षेत्र नम्बर २ क मुडिवा टोलमा भएको पार्टी प्रवेश तथा वृहत सभालाई सम्बोधन गर्दै भट्टराईले खाडीको पसिना बगाउने नौजवानहरूलाई स्वदेशमै पसिना बगाउने व्यवस्था मिलाउनुपर्ने बताए
देशभित्रै श्रम गर्ने, आत्मसम्मानका साथ नेपाली हुँ भनेर गर्व गर्ने अभियानमा हामी सबै एकताबद्ध भएर लाग्नुपर्ने छ,’ भट्टराईले भने भने, ‘अहिले पनि नेकपा एमाले सरकारमा त छ । तर, हामीले सरकारको नेतृत्व गर्न पाएका छैनौँ । मधेसको सरकारमा हामी छौँ । तर, मुख्यमन्त्री हामीसँग छैन । त्यसैले हामीले जनताले चाहेको जस्तो काम गर्न पाएका छैनौँ । ०८४ मा निर्वाचन हुँदैछ । अब नेकपा (एमाले)को एउटै सङ्कल्प छ । यो देशको प्रधानमन्त्री नेकपा एमालेको हुनेछ । मधेसको मुख्यमन्त्री नेकपा एमालेको हुनेछ हामीले त्यो सन्देश गाउँ गाउँमा लैजानु पर्ने छ ।’
भट्टराईले विविधतायुक्त देशमा सबै मिलेर अघि बढ्नुपर्नेमा पनि जोड दिए । ‘म जुन जिल्लामा जन्मिएको हुँ त्यहाँ अहिले पनि हिउँ परिरहेको छ । अहिले म जहाँ बोल्दै छु । यो ठाउँमा असाध्यै गर्मी छ । नेपालको विशेषता नै यही हो । नेपाल हिमाल, पहाड र तराईको देश हो,’ उनले भने, ‘मैले संसदमा प्रतिनिधित्व गरेको जिल्ला ताप्लेजुङका दिदीबहिनी, दाजुभाइ, आमाबुबाहरूले अहिले पनि बाक्लो पोसाक लगाइरहनु भएको छ । यहाँ पातलो पोसाकले पनि गर्मी भइरहेको छ । नेपालको विशेषता नै यही हो ।’गरिबी, अशिक्षा, पछौटेपनबाट देशलाई मुक्त गर्दै शिक्षा, स्वास्थ्य, रोजगारीका अवसर सिर्जना गर्ने एमालेको उद्देश्य रहेको भट्टराईको भनाइ छ ।
लेखकको बारेमा
