काठमाडौँ । वर्तमान शासन व्यवस्थाको विकल्पमा राष्ट्रपतीय प्रणालीमा जानुपर्ने वक्ताहरुले जोड दिएका छन् । आज (मंगलबार) काठमाडौंमा आम जनता पार्टीले गरेको ‘गणतन्त्र कस्को ? दलको कि जनताको’ विषयक सर्बपक्षीय अन्तरक्रियामा बोल्ने अधिकांश वक्ताहरुले यस्तो आवश्यकत्ता औंल्याएका हुन् ।आम जनता पार्टीका अध्यक्ष प्रभू साहले ठूलो बलिदानीबाट प्राप्त गणतन्त्र मुट्ठीभरको स्वार्थमा सिमित भएकोले यसको विकल्प खोज्न जरुरी भएको बताएका छन् । अहिले देशमा वर्तमान व्यवस्था जनताको पक्षमा नरहेको बताउँदै भने,“आम जनता लाचार, तर दलका नेता र तिनका सिमित आसेपासेहरु मालामाल रहेको कहालि लाग्दो स्थितिलाई हामिले कहिलेसम्म सहने ।” नेपाल बार एसोसियसनका अध्यक्ष गोपालकृष्ण घिमिरेले वर्तमान न्याय प्रणाली र देशको शासन प्रणाली जनमुखी नरहेकोले यसमा व्यापक संशोधन र सुधार गर्नुपर्नेमा जोड दिए । अध्यक्ष घिमिरेले हरेक नेता तथा कार्यकर्ता दलभन्दा माथि उठेर देश र जनताको पक्षमा लाग्नुपर्नेसमेत सुझाए । राजनीतिक विश्लेषक प्रा.डा.सुरेन्द्र केसीले जनताले ठूलो त्याग तपस्या गरेर ल्याएको गणतन्त्रलाई दलहरुले निश्चित वर्गको लुटको स्वर्ग बनाउने आधार बनाएको आरोप लगाए । उनले भारतमा संविधान निर्माण गर्दा ६ करोड लागेको तर नेपालको संविधान बानाउन अरबौैं–अरब लाग्नु दुःखत भएको बताउँदै भने,“संविधान निर्माण गर्दाखेरी नै देश कंगाल बनाउने आधार खडा भइसकेको थियो ।” एक अर्को प्रशंगमा डा.केसीले वर्तमान विज्ञान र प्रविधिको विकासले हरेकको हातहातमा मोबाईल भपछि ठूला कर्पोरेट मिडिया आवश्यक नरहेकोसमेत बताउँदै भने,“ठूला भनिएका मिडियामा जनताको विश्वास उडेपछि किन चाहियो कान्तिपुरजस्ता मिडिया ।” नागरिक समाजका अगुवा डा. सन्दरमणी दिक्षीतले जन आन्दोलनमार्फत राजा फालेर ल्याइएको गण्तन्त्रमा पनि अनगिन्ति छोटे राजाहरुले देशलाई असफल बनाउन लागेको आरोप लगाए । संसदीय व्यवस्थामा संसद मन्दिरतुल्य भएपनि अहिले त्यसलाई मजाक बनाईरहेकोप्रति रोष प्रकट गरे । दीक्षितले भने,“अहिले सत्ता र प्रतिपक्ष कोही पनि जिम्मेवार देखिएनन्, त्यसैले बिद्रोह गरेर भएपनि यो व्यवस्था खारेज गरेर राष्ट्रपतीय प्रणालीमा जानुपर्छ ।” लोकतन्त्रको सुन्दर पक्ष प्रेस स्वतन्त्रता भए पनि कैलाश सिरोहियालाई गिरफ्तार गरेर वर्तमान सरकारले शाही सत्तको झल्को दिएको आरोपसमेत लगाए । उनले देशको प्रमुख दुुष्मन भ्रष्टाचार भएको र संविधान संशोधन गरेर भ्रष्टाचारीलाई मृत्युदण्डको व्यवस्था गर्नु पर्ने पनि बताए । आम जनता पार्टीका वरिष्ठ उपाध्यक्ष तिलक थापा मगारले वर्तमान शासन व्यवस्थाले देशलाई दिनप्रति दिन कम्जोर बनाउँदै लगेको जिकिर गर्दै तेस्रो जनाआन्दोलनको तयारी गर्नुपर्नेमा जोड दिए । किरात स्वायत्त प्रदेश संघर्ष समिति संयोजक नगेन्द्र राईले जनयुद्ध र जनाआन्दोलनबाट पहिचानको मुद्धालाई स्थापित गरेपनि पछिल्लो समयमा त्यसको विरुद्धमा मुख्य दलहरु लागेको आरोप लगाए । आम जनतापार्टी उपत्यका विशेष कमिटी अध्यक्ष देवी पण्डितले सभाअध्यक्षता गरेको कार्यक्रमलाई पार्टी प्रवक्ता चन्द्र भुषण साहले सञ्चालन गरेका थिए ।