विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्डले बङ्गलादेशको उदाहरण दिएर आफूले गलत नबोलेको बताएका छन् ।विराटनगर विमानस्थलमा आज सञ्चारकर्मीहरूसँग कुराकानी गर्दै प्रचण्डले दुईतिहाइ बहुमत छ भनेर सरकारले जे पायो त्यही नगरोस् भन्ने खबरदारी गरेको स्पष्ट पारे ।बङ्गलादेशमा पनि दुईतिहाइको सरकार थियो, यो सरकारले पनि दुईतिहाइको आडमा जे पायो त्यही नगरोस् भनेको हो,’ उनले भने, ‘बङ्गलादेशको विषयलाई लिएर मैले उग्र बोलेको छैन ।’ प्रधानमन्त्री केपी शर्मा ओलीको ब्यवहार नै असभ्य भएको आरोप लगाउँदै उनले ओलीले लगाएको आरोपको प्रतिवाद गरे । अध्यक्ष प्रचण्डले माओवादी संविधान संशोधनको विरोधी नभएको स्पष्ट पार्दै संविधान संशोधन नेपाली जनताले लामो सङ्घर्ष र बलिदानबाट ल्याएका उपलब्धि उल्ट्याउने ढङ्गले हुनु हुँदैन भन्नेमा जोड रहेको बताए । ‘प्रतिगामी किसिमले हुनुहुँदैन । जनताले पाएका अधिकार खोस्ने तरिकाले हुनुहुँदैन भन्ने हो’ उनले भने, ‘अगाडि जानका लागि, अझ जनतालाई अधिकार दिनका लागि संविधान संशोधनमा हाम्रो विरोध छैन ।समानुपातिक र समावेशीसहित उत्पीडित समुदायले पाएको अधिकारलाई कुनै तरीकाले कमजोर पार्ने काम भए नेपाली जनतालाई सह्य नहुने प्रचण्डले चेतावनी दिएका छन् ।