काठमाडौँ । विद्यालय शिक्षा विधेयक आज नै पारित गर्न सांसदहरूले माग गरेका छन् । संसद्को शिक्षा समिति बैठकमा शिक्षामन्त्री रघुजी पन्तले आज पारित गर्ने विषय स्थगित गर्न प्रस्ताव गरेका थिए । उनको प्रस्तावमा विरोध जनाउँदै शिक्षा समिति सदस्यहरूले विधेयक आजै पारित गर्न माग गरेका हुन् ।शिक्षामन्त्री पन्तको प्रस्तावमा कांग्रेस प्रमुख सचेतक श्यामलाल घिमिरेले अर्को दिनका लागि बैठक स्थगित गर्नुपर्ने बताएका थिए । उनले ८० प्रतिशत माग सम्बोधन भइसकेको अवस्थामा २० प्रतिशतका लागि सडकमा जानुपर्ने अवस्थाको सिर्जना गर्न नहुने बताए । सहमतिका आधारमा जानको लागि भएपनि आजको बैठक स्थगित गर्नुपर्ने उनले बताए । शिक्षामन्त्री पन्त र प्रमुख सचेतक घिमिरेको प्रस्तावमा सांसदहरूले आपत्ति जनाएका हुन् । उनीहरूले कुनै स्वार्थ समूहको स्वार्थमा लाग्न नहुने बताए । पूर्व शिक्षामन्त्री तथा रास्वपा सांसद सुमना श्रेष्ठले भोट बैंक बचाउनको लागि शिक्षासँग खेलबाड गर्न नमिल्ने बताइन् । आजै विधेयक पारित गर्नुपर्नेमा उनले जोड दिए । त्यस्तै कांग्रेस सांसद डीक बहादुर लिम्बुले आजै अन्तिम रूप दिएर विधेयक पारित गर्नुपर्ने बताए । पूर्व शिक्षामन्त्री तथा माओवादी केन्द्रका सांसद देवेन्द्र पौडेलले कानुन बनाउन पाउने संसद्को अपमान भएको बताए । विधेयक आज टुङ्गो लगाएर आजैदेखि बिट मार्ने बेला भएकोमा अन्तिममा आएर स्थगित गर्न दुखद भएको बताए । एमालेकै अर्की सांसद सरिता भुसालले एक जनाले रोक्न खोजेको खण्डमा समिति बैठक रोक्न नहुने बताइन् । जनमत पार्टीकी सांसद् बिनिता कुमारी सिंहले समेत विधेयक आजै पारित गर्नुपर्ने बताइन् । एमाले सांसद ईश्वरी घर्तीले समेत आज नै विधेयक पारित गर्नुपर्ने बताइन् ।विधेयक नेपाल शिक्षक महासङ्घले नभई सांसदहरूले टुङ्गो लगाउनुपर्ने बताइन् ।