विराटनगर ।पूर्व अर्थमन्त्री तथा नेपाली काँग्रेसका नेता ज्ञानेन्द्रबहादुर कार्कीले वर्तमान सत्ता गठबन्धनको सरकार पाँचै वर्ष टिक्ने बताएका छन् । उनले नेकपा एमाले पाँच वर्ष प्रतिपक्षमा बस्ने दाबी पनि गरे । सुनसरी सदरमुकाम समेत रहेको इनरुवा नगरपालिका ४ को हनुमान चौकदेखि सीमावर्ती देपानगञ्ज गाउँपालिकासम्म जोड्ने सडकको शिलान्यास गर्ने कार्यक्रममा उनले यस्तो बताएका हुन् । नेपालमा अस्थिरता मच्चाउने शक्ति सधैँ लागिरहेको छ । त्यस शक्तिलाई पराजित गर्नु अहिलेको चुनौती हो,’ कार्कीले भने, ‘वर्तमान सरकार ढल्छ भन्ने हल्ला चलाइएको छ । म तपाईँहरूलाई ढुक्कका साथ भन्छु आउने पाँचै वर्ष गठबन्धनको सरकार टिक्छ, एमाले पाँचै वर्ष प्रतिपक्षी हुन्छ ।’ उनले नेकपा एमाले र काँग्रेस मिलेर सरकार बनाउने विषय पनि हल्ला मात्रै भएको र त्यो असम्भव भएको बताए । सडक शिलान्यास कार्यक्रममा कोसी प्रदेश भौतिक पूर्वाधार मन्त्री दुर्गाप्रसाद चापागाईँले विकासले गति लिए मात्र मानवको जीवनस्तर उठ्ने भएकाले भौतिक पूर्वाधारको काम समयमा सक्न आग्रह गरे । उक्त सडक दक्षिण सीमावर्ती देवानगञ्ज गाउँपालिकाको वडा नम्बर ६ रासीको चमैनिया पोखरीबाट सुरु भएर इनरुवा ४ मा रहेको सशस्त्र क्याम्प हुँदै मुख्य राजमार्गको हनुमान चौक राजमार्गमा जोडिनेछ ।