काठमाडौँ । श्रम, रोजगार तथा सामाजिक सुरक्षा मन्त्रालयले एकीकृत श्रम तथा रोजगार सेवा (सञ्चालन तथा व्यवस्थापन) कार्यविधि २०८० स्वीकृति गरी कार्यान्वयनमा ल्याएको छ ।नागरिकलाई व्यावसायिक सीप विकास, रोजगार प्रवर्द्धन, उत्पादनशील रोजगार सिर्जना, उद्यमशीलता प्रवर्द्धन, वैदेशिक रोजगारीको लागि श्रम स्वीकृतिमा सहजीकरण लगायतका श्रम तथा रोजगार सम्बन्धी सेवा तथा सुविधा स्थानीय तहबाटै एकीकृत रूपमा प्रदान गर्न मन्त्रालयले उक्त कार्यविधि ल्याएको हो । उत्पादनशील रोजगार सिर्जना गर्न सरकारी, निजी, सहकारी तथा गैर सरकारी क्षेत्रसँग समन्वय, सहकार्य तथा साझेदारी गरिने मन्त्रालयका सहायक प्रवक्ता कविराज उप्रेतीले जानकारी दिए ।यसको अतिरिक्त श्रम बजारमा रोजगारीको प्रवर्द्धन तथा विस्तार गर्न आवश्यकता र मागको आधारमा स्थानीय तहमा रहेको रोजगार सेवा केन्द्रलाई नमुना रोजगार सेवा केन्द्रको रूपमा सञ्चालन गर्न सकिने व्यवस्था समेत कार्यविधिमा रहेको उनको भनाई छ ।कार्यविधिको कार्यान्वयन पश्चात् नागरिकले श्रम र रोजगार सम्बन्धी सबै सेवाहरू आफ्नै स्थानीय तहबाट प्राप्त गर्न सक्षम हुने विश्वास लिइएको छ ।