काठमाडौँ — प्रमुख प्रतिपक्षी एमाले सांसदले आन्दोलनरत शिक्षकसँग वार्ता गरेर विद्यालय सञ्चालन हुने वातावरण बनाउन शिक्षामन्त्री अशोककुमार राईको ध्यानाकर्षण गराएका छन् ।संसदीय दलका सचेतक महेश बर्तौला नेतृत्वको सांसदहरुको टोलीले बिहीबार शिक्षामन्त्री राईलाई भेटेर शिक्षकहरुको जायज माग पूरा गर्नसमेत आग्रह गरेको हो । शिक्षा विधेयक शिक्षक पेसालाई मर्यादित, सम्मानित बनाउने र सार्वजनिक शिक्षण संस्थाको गुणस्तर र विश्वसनियता बढ्ने अघि आउन नसकेको उनले जनाए । उनले शिक्षकका पेसागत हकहितसँग सम्बन्धित मागहरु वार्ताबाट समाधान गर्दा उचित हुने औंल्याए । ‘भोलि पनि विद्यालय बन्द हुने अवस्था छ । सरकारले जिम्मेवारीबोधका साथ भूमिका खेलेर वार्ताबाट नै समस्या सुल्झाउन सक्नुपर्छ,’ उनले भने । आन्दोलनबाट सहमति नभए विधेयक फिर्ता लिनसमेत शिक्षामन्त्री राईलाई आग्रह गरिएको बर्तौलाले जनाए । ‘शिक्षा विधेयक शिक्षाका समस्या समाधान गर्ने गरी आएको छैन । सरकारले अग्रगामी सोच राख्छ भने त फिर्ता लिएर समृद्धि बनाएर पुनः पेस गर्न सकिन्छ,’ उनले भने, ‘विद्यालय शिक्षा विधेयकभन्दा संघीय शिक्षा ऐन ल्याउनु पर्ने थियो । सरकार त्यसमा चुकेको छ ।शिक्षा तथा स्वास्थ्य समितिका सांसद विद्या भट्टराई, दिपा शर्मा, ईश्वरी घर्तीमगर पनि टोलीमा सहभागी थिए । शिक्षामन्त्री राईले शिक्षकहरुको माग सम्बोधन गर्न पहल गर्ने प्रतिबद्धता जनाएको सचेतक बर्तौलाले जनाए ।