काठमाडौँ । नेपाली कांग्रेसका केन्द्रीय सदस्य चन्द्र भण्डारीले युवालाई देशमै रोक्ने गरी शिक्षा, स्वास्थ्य र रोजगारीका अवसरहरू सिर्जना गर्नुपर्ने बताएका छन् । कांग्रेस केन्द्रीय कार्यसमितिको बैठकमा सोमबार नेता भण्डारीले देशबाट प्राविधिक र उच्च शिक्षाका नाममा बर्सेनि करिब डेढ खर्ब रुपैयाँबाहिर गइरहेको बताए । गरिबका छोराछोरीले पढ्ने २४७ वटा कलेजहरू बन्द हुँदा ९ हजारभन्दा धेरै विद्यार्थीले पढ्न नपाएको भण्डारीको भनाइ थियो ।  ‘देशमा गरिबका छोराछोरीले पढ्न पाउने कलेजसमेत बन्द गराएर कसले के गर्न खोजिरहेको छ ?’ उनको प्रश्न छ, ‘हिजो वीर अस्पतालमा गरिबका छोराछोरीले नर्स, अनमी र एचए पढ्थे, पाटनमा पढ्थे । तर अहिले त्यस्ता २४७ वटा कलेजहरू बन्द भएका छन् । त्यसबाट ९ हजारभन्दा बढी गरिबका छोराछोरीले पढ्न पाउने अवसर गुमाएका छन् ।’ देशमा युवा नै नरहने हो भने अहिलेको पुस्ताले जे गरे पनि त्यसको अर्थ नहुन उनको भण्डारीको भनाइ थियो । ‘हामीले यहाँ बहस गरिरहेका छौँ । संसद्‍मा छलफल गरिरहेका छौँ । दिनहुँ देशमा केही होस् भनेर काम गरिरहेका छौँ,’ उनले  भने, ‘तर हामीले जति गरे पनि भोलि त्यसको लाभांश लिने पिँढी नै देशमा नहुने भने हामीले जति जे गरे पनि त्यसको के अर्थ ?’