काठमाडौं । प्रतिनिधि सभाका विषयगत समितिका सभापतिहरुले समितिको बैठक राख्दा गणपूरक संख्या पुर्‍याउनै कठिन रहेको गुनासो गरेका छन् ।प्रतिनिधि सभाको फुल हाउसमा गणपुरक संख्या नपुग्दा त्यसले बहस सिर्जना गर्ने तर, संसदीय समितिको बैठकमा गणपुरक संख्या नपुग्ने समस्या सुनाउँदा कतै सुनुवाइ नहुने उनीहरुको गुनासो छ सभामुख देवराज घिमिरेले मंगलबार प्रतिनिधि सभामा राष्ट्रिय मान्यताप्राप्त दलका प्रमुख सचेतक र सचेतकहरू तथा संसदीय समिति सभापतिलाई छलफलमा बोलाएका थिए । सिंहदरवार स्थित सभामुखको कार्यकक्षमा बसेको बैठकमा समिति सभापतिहरुले गणपुरक संख्याकै कारण समितिको बैठक राख्नमा समस्या हुने गरेको गूनासो गरेका हुन् । छलफलमा समितिका सभापतिहरुले प्रगति विवरण सुनाएका थिए । त्यसमा सबैभन्दा बढी बैठक कानून, न्याय तथा मानव अधिकार समितिको बसेको विवरण प्रस्तुत भएको छ । हालसम्म यो समितिको ६३ वटा बैठक बसेको संसदीय अभिलेख छ ।यही समितिका सभापति बिमला सुवेदीले पनि गणपूरक संख्याको कारण समस्या हुने गरेको बताइन् । समितिको बैठक बस्नका लागि सम्बन्धित मन्त्रीको उपस्थिति अनिवार्य हुने प्रावधानका कारणले समेत कतिपय अवस्थामा बैठक ढिलो बस्ने वा बैठक नै स्थगित गर्नु परेको पनि उनले बताइन् ।प्रतिनिधि सभा नियमावलीको नियम १७८ मा संसदीय समितिको बैठकमा सम्बन्धित विषयको मन्त्रीको उपस्थिति हुनुपर्ने प्रावधान छ । ‘समितिमा विधेयकमाथि हुने छलफलमा मन्त्रीको उपस्थिति अनिवार्य हुनेछ । अन्य कार्यसूचीमाथिको छलफलमा समेत मन्त्री उपस्थित हुनुपर्नेछ ।’ नियमावलीको नियम १७८ को उपनियम ४ मा भनिएको छ ।यो प्रावधानको मनसाय असल रहेको र यस्तो प्रावधानले समितिमा हुने छलफलमा सरकार जानकार हुने र अगाडि बढाउन सहज हुने भएता पनि कतिपय अवस्थामा यही प्रावधानका कारण समिति प्रभावित हुने गरेको सभापति सुवेदीले बताइन् । मंगलबारको छलफलमा सहभागी प्रतिनिधि सभाका विषगत समितिका अन्य सभापतिहरुले समेत गणपूरक संख्याका कारण समस्या हुने गरेको भनी सभमुखको ध्यानाकर्षण गरे । एक जना सभापतिले ‘सांसदलाई बैठकमा ल्याउनै धौ पर्ने’ गरेको उल्लेख गर्दै समस्या समाधानको उपाय खोजिनुपर्ने प्रस्ताव राखे ।संसदीय समितिको बैठक बस्नका लागि समितिमा तत्काल कायम रहेका सदस्य संख्याको ५१ प्रतिशत सदस्य उपस्थित हुनुपर्ने व्यवस्था छ । यससम्बन्धी व्यवस्था प्रतिनिधि नियमावलीको नियम १८२ मा छ ।समितिको गणपूरक सङ्ख्या समितिको तत्काल कायम रहेको सदस्य संख्याको एकाउन्न प्रतिशत हुनेछ’ नियमावलीको नियम १८२ को उपनियम (१) मा छ । समितिको बैठकमा गणपूरक संख्या नपुगेसम्म समितिको सभापतिले बैठकको कार्य स्थगित गर्ने वा अर्को समय तोक्नुपर्ने हुन्छ । गणपूरक सङ्ख्या नपुगेर स्थगित भएको बैठक सोही बैठकको निरन्तरताको रुपमा अर्को बैठक बसे त्यस्तो बैठक एक तिहाई सदस्यको उपस्थितिमा बस्न सक्छ ।यस्तो बैठक बस्दा सभामुखलाई दिनु पर्ने हुन्छ । तर, यस्तो बैठक राख्दा वैठक भत्ता लगायतका सेवा सुविधाका सन्दर्भमा असर पर्ने भएकाले कम अभ्यास हुने गरेको छ ।