रौतहट । पूर्वाधार विकास कार्यालय गौरमा चार दिन अघि तालाबन्दी गरेका नेपाली कांग्रेसका नेताहरूले आइतबार सहमतिपछि ताला खोलेका छन् ।प्रमुख जिल्ला अधिकारी हिरालाल रेग्मीको पहलमा जिल्ला प्रशासन कार्यालय रौतहटमा आइतबार बिहान बसेको सर्वपक्षीय बैठकमा सहमति जुटेपछि ताला खोलिएको हो । तालाबन्दीको भोलिपल्ट बिहीबार जिल्ला समन्वय समितिका सभापति राम अयोध्या यादवलाई ज्ञापनपत्र बुझाउँदै कांग्रेस जिल्ला सभापति जितेन्द्रले पूर्वाधार विकास कार्यालयको बेथिति अन्त्य गर्न माग गरेका थिए ।उनले आर्थिक वर्ष २०८०÷०८१ मा रातो कितावमा रहेका मधेस प्रदेश सरकार मार्फत यस जिल्लामा परेको योजनाहरू पूर्वाधार विकास कार्यालयका प्रमुख र कर्मचारीको योजनाको पत्र दिनु अघि कमिशन लिइरहेको आरोप लगाएका थिए । उता भौतिक पूर्वाधार कार्यालय गौरका प्रमुख विनोद कुमार ठाकुरले कांग्रेसले लगाएको सम्पूर्ण आरोपको खण्डन गरेका थिए । उनले कसैको काम गरेको बापत एक टुक्रा सुपारी खाएको भए पनि पुष्टि गर्न कांग्रेस पक्षलाई चुनौती दिएका छन् ।