काठमाडौँ । राष्ट्रिय मुक्ति क्रान्ति नेपालका अध्यक्ष राजेन्द्र महतोले कात्तिकको पहिलो हप्ता पार्टी दर्ता गराउने गरी प्रक्रिया थालेका छन् ।राष्ट्रिय मुक्ति क्रान्ति नेपालले बुधबारदेखि सनाखतका लागि जिल्ला जिल्लामा सर्कुलर पठाएको छ । पार्टी दर्ताका लागि कम्तीमा पाँच हजार जनाको हस्ताक्षर चाहिन्छ । दसैँभरि हस्ताक्षर सङ्कलन गर्ने र कात्तिकको पहिलो हप्तातिर पार्टी दर्ता गराउने सो पार्टीका नेता केशव झाले बताए ।झाले भने, ‘आयोगमा दर्ताका लागि सनाखत गराउन कम्तीमा पाँच हजार हस्ताक्षर चाहिन्छ तर १०–१५ हजार हस्ताक्षर सङ्कलन गर्ने लक्ष्य छ ।’ दसैँभरमा विधान, घोषणापत्र तथा हस्ताक्षर सङ्कलनका काम सक्ने तयारी रहेको उनले बताए ।पार्टीको विधान र घोषणापत्रको ड्राफ्ट तयार भइरहेको झाले बताए । राष्ट्रिय मुक्ति क्रान्ति नेपाल र राष्ट्रिय मुक्ति क्रान्ति अलगअलग संगठन हुनेछ । राष्ट्रिय मुक्ति क्रान्तिले आन्दोलन र सङ्घर्षका कार्यक्रम सञ्चालन गर्छ भने राष्ट्रिय मुक्ति क्रान्ति नेपाल पार्टीले संसदीय राजनीति गर्ने भनिएको छ ।बहुल राष्ट्र निर्माणको माग गर्दै आन्दोलन थालेको राष्ट्रिय मुक्ति क्रान्तिले विभिन्न राज्यको स्थापना गर्दै स्वशासनसहितको आफ्नै विधान घोषणा समेत गर्ने तयारी थालेको छ । राष्ट्रिय मुक्ति क्रान्तिले छुट्टै सत्ताको अभ्यास गर्ने गरी तयारी थालेको छ । त्यसका लागि कार्यक्रम बनाउने काम भइरहेको छ । नेता मेहताका अनुसार १२ वटा परिषद्ले आ–आफ्नो विधान बनाउने काम गरिरहेका छन् । कतिपयको विधान तयारी भइसकेका छन् । पार्टी दर्ता प्रक्रियामा गइसकेपछि सत्ताको अभ्यासमा लाग्ने उनले बताए । सम्भवतः मंसिरदेखि राष्ट्रिय मुक्ति क्रान्तिले आफ्नो सत्ताको अभ्यास सुरु गर्नेछ ।राष्ट्रिय मुक्ति क्रान्तिले नेवाः राष्ट्रिय परिषद्, चौवाङ राष्ट्रिय परिषद्, मगर राष्ट्रिय परिषद्, लिम्बुवान राष्ट्रिय परिषद्, चेपाङ राष्ट्रिय परिषद् गरी हाल १२ वटा परिषद् गठन गरेको छ । जुन देशैभर क्रियाशील छन् । ५० वटा परिषद् बनाउने लक्ष्य राखेको नेताहरूको भनाइ छ । जति वटा परिषद्हरु हुन्छन्, ती सबैले आ–आफ्नो सत्ता आफैँ सञ्चालन गर्ने जनाइएको छ । त्यसको आफ्नै विधान, आफ्नो सबै संरचना हुनेछ । देशमा हरेक समुदायको आ–आफ्नो राष्ट्रियता र पहिचान छन् । ती पहिचानको आधारमा स्वशासन हुनुपर्ने नेता झाले बताए । त्यसको आफ्नै भाषा, आफ्नै संस्कृति आफ्नै पहिरन लगायत हुन्छ ।