काठमाडौँ । सार्वजनिक लेखा समिति सभापति ऋषिकेश पोखरेलले महालेखाको वार्षिक प्रतिवेदनमाथि आगामी दिनमा कार्यतालिका नै बनाएर समितिमा छलफल चलाउने बताएका छन् । महालेखा परीक्षक कार्यालयको वार्षिकोत्सव कार्यक्रमलाई सम्बोधन गर्दै पोखरेलले विगतका केही वार्षिक प्रतिवेदनमाथि लेखा समितिमाथि छलफल हुन ढिलाइ हुँदा एकातर्फ सोको सान्दर्भिकता नै हराएको र अर्कोतर्फ एउटै कार्यका लागि धेरै पक्षको समय, मेहनत खेर गइरहेको बताएका हुन् । सभापति पोखरेलले भने–‘लेखा समितिको प्रयासले मात्रै बेरुजु फर्छ्यौट नहुने हुँदा आर्थिक कार्यविधि तथा वित्तीय उत्तरदायित्व ऐनको मर्मअनुसार सोही वर्ष भित्र नै बेरुजु फर्छ्यौट टुङ्ग्याउने गरी निकाय तथा कार्यालयहरूले समेत कार्यसम्पादन गर्नुपर्दछ ।’