मकवानपुर १६ जेठ,।नेपाली कांग्रेसका महामन्त्री गगनकुमार थापाले स्थानीय तहमा निर्वाचित जनप्रतिनिधिलाई शासकका रूपमा नभएर जनताका सेवक बनेर काम गर्न सुझाएका छन् । स्थानीय तह निर्वाचनमा हेटौंडा उपमहानगरपालिकामा गठबन्धनको तर्फबाट निर्वाचित प्रतिनिधिलाई सम्मान गर्दै थापाले नागरिकको सेवकका रूपमा काम गरेर उनीहरुको जीवन बदल्ने प्रयास गर्न आग्रह गरेका हुन् । ‘जनप्रतिनिधिले शासक बनेर होइन, सेवकका रूपमा काम गर्न जरुरी छ । अघिल्लो स्थानीय तहमा चुनावमा निर्वाचितले शासकको रुपमा काम गर्दा अहिले धेरै पुराना जनप्रतिनिधि पराजित हुनुपरेको छ,’ उनले भने । थापाले नेकपा एमालेका कारण २०७४ को स्थानीय चुनावदेखि हालसम्मको अवधि खेर गएको टिप्पणी गरे । ‘अघिल्लो पाँचवर्ष स्थानीय, प्रदेश र संघीय सरकार नेकपाको कब्जामा थियो । एमालेका कारण कुनै पनि संरचनाले काम गर्न पाएन । अब हाम्रो हातमा सबै शासन व्यवस्था रहेको छ । नयाँ अध्यायको प्रारम्भ भएको छ ।’, उनले एमालेले स्थिरता र विकास गर्ने अवसर गुमाएको टिप्पणी गरे । ‘एमालेले स्थानीय तहको निर्वाचनलाई परामदेश र जनदेशबीचको लडाइँका रूपमा चित्रण गरेको थियो । जनता हाम्रो पक्षमा रहेको प्रस्ट भइसकेको छ । हामीले समय खेर फाल्नुहुँदैन । जनतासँग साक्षत्कार गर्दै अगाडि बढ्नुपर्छ,’ थापाले भने ।