जनकपुरधाम । सप्ताहव्यापी विवाहपञ्चमी महोत्सवको पाँचौ दिन आज जानकीको मटकोर सम्पन्न भएको छ ।जानकी मन्दिरबाट बाजागाजासहित पुगेर जनकपुरधामको एतिहासिक गंगासागरमा भव्यतापूर्वक जानकीको मटकोर सम्पन्न गरिएको हो ।मिथिलाको परम्परा अनुसार जानकीको मटकोर विधि भएको हो । प्रतीकात्मक बालबालिकालाई बनाइएको जानकीलाई मटकोर गरिन्छ ।त्यहाँ उपस्थित संयौ नरनारीले मटकोर गीत गाएर रमाएका थिए । सो अवसरमा गंगासागरमा नित्यदिन साँझ हुने गंगा महा आरती दिउँसै नै भएको छ । मटकोर अब्लोकन गर्न हजारौं श्रद्धालुको भीड लागेको थियो ।सप्ताहव्यापी विवाहपञ्चमी महोत्सवको छैठौं दिन भोली शुक्रबार जनकपुरमा भगवान राम र जानकीको डोला फेर गरी सोयम्बर गरी विवाहको काज हुने छ ।मंसिर १६ गतेबाट विधिवत सुरु भएको सीताराम विवाहपञ्चमीको पहिलो दिन नगर दर्शन, दोस्रो दिन फुलबारी लिला, तेस्रो दिन धनुष यज्ञ, चौथो दिन तिल्कोत्सव सम्पन्न भइसकेको छ ।भोलि विवाहपञ्चमी र शनिबार अयोध्याबाट जन्ती आएका साधुशन्तको बिदाई अर्थात् राम कलेवा गरी विवाहपञ्चमी महोत्सव विधिवत सम्पन्न हुने छ ।