बाँके:  बाँकेको बैजनाथमा मंगलबारदेखी ‘प्रथम जिगाउँ कप-२०८१’ खुल्ला फुटबल प्रतियोगिता सुरु भएको छ । अरनिको युवा क्लब बैजनाथ-५ जिगाउँको आयोजनामा उक्त प्रतियोगिता सुरु भएको हो । प्रतियोगिताको प्रमुख अतिथी एवम् बैजनाथ गाउँपालिका अध्यक्ष प्रकाशबहादुर शाहीले औपचारिक रुपमा उद्घाटन गरेका हुन् । रेफ्रीलाई बल हस्तान्तरण गरेर उनले प्रतियोगिता उद्घाटन गरे । उद्घाटन कार्यक्रमलाई सम्बोधन गर्दै अध्यक्ष शाहीले यस्ता प्रतियोगिताले नयाँ खेलाडी उत्पादन गर्नमा भूमिका खेल्ने विश्वास गरे । अरनिको युवा क्लबका अध्यक्ष गंगाराम पुन मगरको अध्यक्षतामा भएको प्रतियोगिता उद्घाटन कार्यक्रममा जनप्रतिनिधि, समाजसेवी, राजनीतिककर्मी, खेलप्रेमी लगायतको उपस्थिती रहेको थियो । प्रतियोगिताका विजेता टिमले एक लाख ५ हजार ५ रुपैयाँ र उपविजेताले ५१ हजार १ सय १५ रुपैयाँ पुरस्कार प्राप्त गर्ने आयोजकले जनाएको छ । प्रतियोगितामा १४ वटा टिमको सहभागिता रहेको छ । प्रतियोगिता ५ दिन सम्म सञ्चालन हुने आयोजकले जनाएको छ । प्रतियोगिताको पहिलो दिन धम्बोझी युवा क्लब र आयोजक अरनिको युवा क्लबबीच प्रतिस्पर्धा गराइएको थियो । उद्घाटन खेलमा आयोजक टिमलाई हराउँदै धम्बोझी युवा क्लबले विजयी सुरुवात गरेको छ ।