काठमाडौं । मधेश प्रदेशका जिल्लाहरूमा कुष्ठरोगका विरामीहरू सबैभन्दा बढी पाइएका छन् ।स्वास्थ्य तथा जनसंख्या मन्त्रालयले बिहीबार सार्वजनिक गरेको तथ्यांकअनुसार नेपालमा सबैभन्दा बढी कुष्ठरोगका रामी मधेश प्रदेशमा पाइएका हुन् ।बिहीबार काठमाडौंमा सुरु कुष्ठरोगसम्बन्धी अन्तर्राष्ट्रिय सम्मेलनमा मन्त्रालयका सचिव डा. विकास देवकोटाले तथ्यांक प्रस्तुत गरे । उनले मधेश, लुम्बिनी र कोशी प्रदेशमा क्रमशः रोगको उच्च भार रहेको बताए । मधेश प्रदेशमा कुल कुष्ठरोगीको एकतिहाइ भन्दा बढी विरामी रहेको उनले जानकारी दिए । आर्थिक वर्ष २०८०/०८१ को अन्त्यसम्म नयाँ फेला परेका दुई हजार चार सय ७२ कुष्ठरोगीमध्ये महिलाको संख्या एक हजार ४२ छ । १४ वर्षमुनिका नयाँ बिरामीको संख्या एक सय ३६ रहेको सचिव डा. देवकोटाले जानकारी दिए । उनले पहिचान भएका सबै बिरामी उपचाररत रहेको पनि बताए ।आर्थिक वर्ष २०८०/०८१ को तथ्यांक विश्लेषण गर्दा कुष्ठरोगको प्रकोप दर राष्ट्रिय तहमा एकभन्दा कम (०.९२ प्रतिशत) रहेको छ । तर जिल्ला तहको प्रकोप दर हेर्दा ७७ जिल्लामध्ये १८ जिल्लामा एकभन्दा माथि, ४८ जिल्लामा एकभन्दा कम, ११ जिल्लामा कुष्ठरोगका कुनै पनि नयाँ बिरामी फेला परेका छैनन् । कुष्ठरोग निवारणका लागि रोगको प्रकोप दर एकभन्दा कम हुनुपर्छ । प्रति १० हजार जनसंख्यामा एक जनाभन्दा कम व्यक्ति रोगी रहेको अवस्था हुनुपर्छ ।