काठमाडौं १७ असार। उच्च अदालतको आदेशपछि एक दिदीले भाइको मृगौला प्रत्यारोपण गरेकी छन् । विरामीको बाच्न पाउने हक हनन हुने भन्दै उच्च अदालत पाटनले मृगौला प्रत्यारोपणमा अवरोध नगर्नु भनी आदेश दिएको हो । अदालतले आदेश दिनुअघि उनीहरु सहोदर दिदीभाइ नदेखिएको भन्दै किष्ट मेडिकल कलेजको मृगौला प्रत्यरोपण स्विकृत समितिले मृगौला प्रत्यरोपणको निर्णय गर्न अस्वीकार गरेको थियो । ‘निवेदीका(राधा महर्जन)लाई उनले पाउन सक्ने र पाउनुपर्ने स्वास्थ्य उपचार र त्यस उपचारबाट बाँच्न पाउने अधिकारमा कसैले पनि रोक लगाउन सकिंदैन’, आदेशमा भनिएको छ, ‘उनलाई पुग्न सक्ने अपुरणीय क्षतिको दृष्टिकोणबाट उचित समयमा विरामीले उपचार नपाएको अवस्थामा निजको बाँच्न पाउने र स्वास्थ्य सम्बन्धी हकबाट बञ्चित हुने देखिएकोले अविलम्ब बिरामीको मृगौला प्रत्यारोपण कार्य सुचारु गर्नु, मृगौला प्रत्यारोपण गर्ने काम उनको हकमा नरोक्नु ।’ अदालतको आदेशपछि राधाको मृगौला प्रत्यारोपण भइसकेको छ ।परिवारका अनुसार, उनीहरु दिदीभाइ भए पनि त्रुटीका कारण उनीहरुको नागरिकताको प्रमाणपत्रमा दुई जनाको उमेर २३ दिनको मात्रै फरक थियो । उनीहरुले नागरिकताको प्रमाणपत्र सच्याउन जिल्ला प्रशासन कार्यालयमा निवेदन दिएपनि प्रशासनले सहयोग नगरेको उनीहरुको भनाइ छ ।