काठमाडौँ । तराई मधेसमा पानी हाहाकार भएको छ । चपा (हाते कल) कल, इनार सुक्न थालेपछि तराई मधेसका विभिन्न जिल्लामा पानीको हाहाकार भएको हो । पानीको हाहाकारको विकल्पको बारेमा सरकारले छलफल थालेको छ । तराई मधेसमा देखिएको खानेपानी समस्या र समाधानका उपायको विषयमा खानेपानी मन्त्री महेन्द्रराय यादवले मन्त्रालयमा छलफल गरिरहेका छन् । खानेपानी मन्त्री यादवले मन्त्रालयमा तराई मधेसका सांसद तथा अन्य सरोकारबालाहरुलाई राखेर छलफल गरिरहेका हुन् । मधेस प्रदेशका आठ वटै जिल्लामा यो समस्या देखिएको छ । महेन्द्रराजमार्ग तल तथा त्यस वरपर पानीको अत्यधिक हाहाका  भएको छ । महोत्तरी, धनुषा, सर्लाही, बारा, पर्साका कतिपय ठाउँमा ट्याङ्कीबाट पानी वितरण सुरु गरिएको छ । स्थानीयहरु पानीको विकल्प खोजी रहेका छन् । पुराना इनार तथा कुवालाई सफा गरिरहेका छन् । पोखरी तथा तलाउलाई पनि प्रयोगमा ल्याउने गरी सरसफाइ सुरु गरिरहेको बताइएको छ । स्थानीय तहले सबै कुरा सम्भव नभएकाले तराई मधेसका नेताहरुले सरकारलाई गुहारेका छन् ।एक साताअघि खानेपानी मन्त्री यादव र जसपाका नेता एवं पर्साका सांसद प्रदीप यादवले प्रधानमन्त्री प्रचण्डलाई भेटेर तराई मधेसमा देखिएको पानीको हाहाकारको बारेमा ध्यानाकर्षण गराएका थिए ।