पर्सा ।आम जनता पार्टी आजपाका अध्यक्ष प्रभु साहले  देशका सम्पूर्ण भन्सार कार्यालयबाट  ४५ प्रतिशत कमिसनबापतको पुरस्कार लिनेहरूको सूची सार्वजनिक गरिनुपर्ने बताएका छन् । पर्साको पोखरियामा आयोजित पार्टी प्रवेश कार्यक्रमलाई सम्बोधन गर्दै पूर्वमन्त्री तथा प्रतिनिधिसभा सदस्य समेत रहेका साहले भन्सार कमिसन भनेर कर्मचारीहरुको नाममा गुपचुपरुपमा रकम गइरहेको बताए ।‘पुरस्कारको नाममा निजी खाताहरूमा रकम गइरहेको छ । त्यो एउटा भ्रष्टाचार हो । होइन भने किन राज्यले पुरस्कारको सूची सार्वजनिक गर्न सक्दैन ?’, साहले भने । राम्रो नियतले कमिसन बापतको पुरस्कार दिएको हो भने राज्यलाई सूची सार्वजनिक गर्न किन आपत्ति हुन्छ भन्दै उनले यसले भ्रष्टाचार मौलाउने कार्यमा राज्यकै सहयोगी भूमिका पुष्टि हुने बताए । 'पुरस्कार लिने जति पनि कर्मचारीहरू छन् उनीहरूको नाम सार्वजनिक गर्नैपर्छ । पुरस्कार लिएर देशका लागि राम्रो योगदान दिने पुलिस र कर्मचारी हो भने गोप्य राख्न जरुरी हुँदैन’, उनको भनाइ छ । कार्यक्रममा साहले नेताहरूले जनतालाई घात गर्दा देशमा समस्या बढ्दै गएको पनि बताए । देशलाई असफल बनाउन लागिपर्ने नेताहरूले ठाउँ खाली गर्न तयार हुनुपर्ने भन्दै उनले वर्तमान व्यवस्थाले देशले निकास नपाउने पनि दाबी गरे । देशलाई सङ्कटबाट निकास दिन अन्तरिम सरकार गठनको विकल्प नभएको उनको भनाइ छ । वर्तमान संवैधानिक व्यवस्था असफल भएकाले प्रत्यक्ष निर्वाचित कार्यकारी राष्ट्रपतिको व्यवस्थामा जानुको विकल्प छैन,’ उनले भने, ‘देशलाई ठोस निकास दिन वर्तमान सरकार असफल भएकाले तत्काल विघटन गरी अब अन्तरिम सरकार गठन गर्नुपर्छ ।सो अवसरमा विभिन्न पार्टी परित्याग गरेर दर्जनौँ व्यक्तिहरू आजपामा प्रवेश गरेका थिए ।