काठमाडौँ । नेपालमा रेशम उद्योगलाई पुनर्जीवन दिँदै वार्षिक ५ खर्ब रुपैयाँ बराबरको आर्थिक मूल्य सिर्जना गर्न सकिने सम्भावना देखिएको छ। कृषि तथा पशुपन्छीमन्त्री डा. मदनप्रसाद परियारले रेशम खेतीले ग्रामीण आयआर्जन, रोजगारी सिर्जना र निर्यात प्रवद्र्धनमा महत्वपूर्ण योगदान दिने विश्वास व्यक्त गरेका छन्।शनिबार काठमाडौँमा आयोजित राष्ट्रिय रेशम सम्मेलनलाई सम्बोधन गर्दै मन्त्री परियारले रेशम उद्योगको भविष्य तीन तहका सरकार, निजी क्षेत्र र सरोकारवाला संस्थाहरूको प्रभावकारी समन्वयमा निर्भर रहेको बताए। करिब २२ हजार हेक्टर क्षेत्रमा किम्बु खेती, रेशम किरापालन र धागो उत्पादनलाई एकीकृत रूपमा विकास गर्न सके मुलुकको अर्थतन्त्रमा ठूलो परिवर्तन आउने देखिएको छ। तर, नीतिगत प्राथमिकताको कमी, वित्तीय पहुँच र बिमाको अभावका कारण यो उद्योग पछिल्लो समय सङ्कटमा पर्दै गएको छ। २५ वर्षअघिसम्म नेपालमा रेशम खेतीको अवस्था राम्रो भए पनि त्यसपछि क्रमशः ओरालो लागेको तथ्याङ्कले देखाउँछ। विश्व बजारमा रेशमको माग बढिरहेकाले छिमेकी मुलुक चीन र भारतको सिको गर्दै नेपालले पनि यस क्षेत्रमा लगानी बढाउनु पर्नेमा विज्ञहरूले जोड दिएका छन्।