काठमाडौँ । जनता समाजवादी दलका प्रमुख सचेतक प्रदीप यादवले कर्मचारी व्यवस्था तथा नियमन गर्ने सङ्घीय निजामती सेवा ऐन ल्याउँदा गम्भीर ढंगले सोचविचार गर्नुपर्ने बताएका छन् । बुधबार प्रतिनिधिसभा बैठकमा सङ्घीय निजामती सेवा सम्बन्धी विधेयकमाथिको सैद्धान्तिक छलफलमा भाग लिँदै सांसद यादवले विधेयकमा निजामती कर्मचारीलाई श्रेणीबाट तहगत प्रणालीमा लाने, आवास सुविधा दिने, सरकारी सुविधा दिने, विशेष आर्थिक सुविधा दिने, स्वास्थ्य सुविधा दिने, स्वास्थ्य बिमा सम्बन्धी सुविधा दिने धेरै सुविधा दिने प्रावधान भएको बताए । कर्मचारीलाई यति धेरै सुविधा दिएकोमा कटाक्ष गर्दै यादवले भने– ‘यो राम्रो कुरा हो, अरू के सुविधा दिने हो दिऊँ न त । मोटरबाइक दिऊँ, स्कुटी दिऊँ, घरमा टिभी दिऊँ, त्यसलाई तेल दिऊँ, सबै सुविधा दिऊँ तर त्यो कर्मचारीबाट सेवा पनि लिऊँ ।’