काठमाडौं २९ जेठ। सांसद अनिलकुमार झाले बजेट निर्माणमा सांसदको भूमिका नहुनु दुःखद रहेको बताएका छन् ।  आइतबार प्रतिनिधिसभाको बैठकमा बोल्दै उनले सिंगो संसद र सांसदहरुको हविगत बढो कहालीलाग्दो रहेको बताए । उनले भने– ‘जुन संसदले देशको नीति निर्माणको काम गर्दछ र जनताबाट प्रत्यक्ष निर्वाचित सबैभन्दा ठूलो जिम्मेवारीको पद मानिन्छ ती सांसदहरुको यो बजेट निर्माणमा के भूमिका छ ? कुनै भूमिका छैन । अहिले सरकारमा हालीमुहाली रहेका नेताहरुको क्षेत्रमा बजेट अलि बढी नै होला । के यो बजेटमाथि मैले भनेको कुराहरु पनि छ भन्ने सांसदहरुको अवस्था होला ? कुनै पनि त्यस्तो ठाउँ छैन । सम्पूर्ण सांसदहरुको र सिंगो संसदको यसमाथि स्वामित्व रहनुपर्छ ।’ उनले सार्वजनिक खरिद अनुगमन कार्यालय आवश्यक छ भने काम दिनुपर्ने अन्यथा किन राख्नुपर्यो भन्दै प्रश्न गरे ।  सांसद झाले सुरक्षित नागरिक आवास कार्यक्रम बजेटमा कतैपनि नभेटिएको बताए । उनले त्यो कार्यक्रम व्यवस्थित गर्नुपर्ने र त्यो कार्यक्रमलाई पालिका स्तरमा सार्नुपर्ने बताए ।