काठमाडौँ । क्रसर तथा खानी उद्योग व्यवसायीहरूले गरिरहेको आन्दोलन स्थगित भएको छ । विगत लामो समयदेखि क्रसर उद्योगहरूको नवीकरणको माग राखी आन्दोलनरत क्रसर तथा खानी उद्योग व्यवसायीहरूले बिहीबारदेखि आन्दोलन स्थगित गरेका हुन् । सरकारसँग तीन बुँदे सहमति भएसँगै व्यवसायीहरूले आन्दोलन स्थगित गरेका हुन् । सहमतीपत्रमा निर्माणमुखी सामग्री(व्यवस्थापन तथा नियमन) विधेयक, २०८० संसदीय समितिमा दफावार छलफलको क्रममा रहेको भन्दै सो विधेयक पारित भए पश्चात् क्रसर उद्योगको नवीकरण सम्बन्धी समस्या सम्बोधन हुने उल्लेख गरिएको छ । सो विधेयक छिटो पारित गराउन आ–आफ्नो तर्फबाट भूमिका निर्वाह गर्ने उल्लेख गरिएको छ । नेपाल क्रसर तथा खानी उद्योग व्यवसायी महासंघका अध्यक्ष सीताराम न्यौपानेले कानुनसम्मत दर्ता भएका उद्योगलाई नवीकरण गरी सञ्चालन गर्न दिन र दिगो व्यवस्थापनका लागि राज्य व्यवस्था समितिमा रहेको कानुनलाई फास्ट ट्रयाकबाट ल्याएर समस्या समाधान गर्न माग गरेको बताए । उनले मागको सुनुवाइ नहुँदा सडक आन्दोलनमा जानुपरेको बताए । उनले दिगो विकास र नवीकरण गर्ने मन्त्री जोशीले प्रतिबद्धता जनाएसँगै आन्दोलन फिर्ता लिएको बताए ।