तत्काल अनुमतिपत्र नपाउँदा राजस्व तिरेको रसिद बोकेर हिँड्नुपर्ने बाध्यताको अन्त्यका लागि ‘नागरिक एप’मा चालक अनुमतिपत्र समावेश गरिएको छ । हाल सोही एपमार्फत ट्राफिक प्रहरीले नियमन गर्ने तथा जरिवाना भुक्तानी गराउने कार्य समेत गर्दै आएको छ । दिगो समाधानका लागि समयमै सवारी चालक अनुमतिपत्र छपाई गर्नुपर्ने भन्दै मन्त्री दाहालले चुस्त र छिटो सेवा उपलब्ध गराउने विकल्प खोज्न निर्देशन दिएका थिए ।दुवै पक्षबीच भएको समझदारीअनुसार सुरक्षा मुद्रण केन्द्रले आगामी असार मसान्तभित्र प्रथम चरणको छपाई गरी विभागलाई हस्तान्तरण गर्ने सम्झौता पत्रमा उल्लेख गरिएको छ ।सो पत्रमा सुरक्षा मुद्रण केन्द्रका कार्यकारी निर्देशक देवराज ढुंगाना तथा यातायात व्यवस्था विभागका महानिर्देशक राजीव पोखरेलले हस्ताक्षर गरेका छन् । सुरक्षा मुद्रण केन्द्रले क्युआर सहित सवारी चालक अनुमतिपत्र छपाई गर्नेछ ।